«Ятим бала тәрбияләгән кеше җәннәттә минем белән ике бармак кебек янәшә булыр» (Хәдис)

яңалыклар

Әлмәт үзәк мәчетенә затлы бүләк тапшырылды

Үзәк мәчетнең ир-атлар намаз укый торган залында келәм яңасына алыштырылды. Әлеге затлы бүләкне Әлмәттә гомер итүче Таҗикстан мөселманнары ясады. Келәмнәр мәчеттә 20 ел алыштырылмаган булган. Яшел төстәге яңа келәмнәр бик матур һәм йомшак. Имам-мөхтәсиб Фәһим хәзрәт Әхмәтҗанов бүләк ясаучыларга чиксез рәхмәтен белдерде.

Әлмәт үзәк мәчетендә «Ризаэддин Фәхреддинның мирасы» дигән викторина үтте

Әлмәтне бөтен илгә таныткан галим Ризаэддин Фәхреддинның тууына быелгы гыйнварда 158 ел тулды. Әлеге уңайдан районда тәүге тапкыр мәшһүр галим, мәгърифәтче, язучы, дин эшлеклесе эшчәнлегенә һәм тормышына багышланган «Ризаэддин Фәхреддинның мирасы» дигән викторина оештырылды. 
Быел Риза Фәхреддин мемориаль музее директоры Диләрә Гыймранова Әлмәт районы мөхтәсибәте белән берлектә викторина игълан итәргә уйлаган. 

Әлмәтлеләр Коръән бәйгесенә чакырыла

Әлмәттә Коръән укучыларның төбәк бәйгесенә сайлап алу туры уздырыла. Анда яшьләренә бәйсез рәвештә Изге Коръәннең 28, 29, 30 нчы җүзен тәҗвид кагыйдәләре нигезендә яттан белгән ир-атлар чакырыла. Сайлап алу туры 21 гыйнварда шәһәрнең үзәк мәчетендә өйлә намазыннан соң 12 сәгать 30 минутта үткәрелә. Таләпләр дә бар. Бәйгедә катнашучы коръән-хафиз булырга тиеш түгел һәм аның татар телен белүе, биредә теркәлеп яшәве зарур. 

Әлмәт делегациясе Уфа шәһәренең "Ихлас" мәчетенә барып кайткан

Күренекле галим, мәгърифәтче, җәмәгать эшлеклесе, дин белгече Ризаэддин Фәхреддиннең тууына 158 ел тулу уңаеннан Уфа шәһәренең "Ихлас" мәчетендә җомга вәгазе укылды, түгәрәк өстәл артында кызыклы очрашулар үткәрелде. 

Әлмәт мөхтәсибәтенең хоккей командасы һәвәскәрләр лигасы турнирында өченче тапкыр җиңү яулады

Гыйнвар башында Әлмәттә 2016-2017 елгы сезонда Әлмәтнең «Нефтяник» хоккей командасы Кубогына ТР көньяк-көнчыгышының һәвәскәрләр командалары арасында алкалы хоккей буенча традицион ярышлар старт алган иде. Әлмәт мөхтәсибәте командасы турнирда чыгышын ике җиңүдән башлады: «Искра» командасы хоккейчыларын 11:5 исәбе белән җиңделәр, Мөслим командасы белән уенда егетләргә техник җиңү язылды – 5:0. Шушы көннәрдә Әлмәт мөхтәсибәте командасы бозда «Әлмәт» командасы белән очрашты. Уенчылар тупланганлык, бердәмлек, җиңүгә ихтыяр, чын спортчыларча дәрт-омтылыш күрсәтеп, көндәшләрен 11:0 исәбенә тар-мар иттеләр.

Әлмәт мөхтәсибәте Риза Фәхреддиннең шәхесе турында викторина үткәрә

17 гыйнварда дин галиме, мәгърифәтче Ризаэддин Фәхреддин (1859-1936) тууына 158 ел тула. Бу шәхес тумышы белән Әлмәт районы Кичүчат авылыннан. Истәлекле дата уңаеннан район һәм шәһәр мөхтәсибәте Ризаэддин Фәхреддиннең мемориаль музее белән берлектә күренекле дин галименең тормышы, эшчәнлеге, рухи мирасына багышланган викторина игълан итте.

28 гыйнварда Әлмәт шәһәрендәге Ризаэддин Фәхреддин исемен йөрткән Үзәк мәчеттә 10.00 сәгатьтә галимгә багышлап татар телендә ачык дәрес узачак. Шуннан соң викторина оештырылып, анда район мәчетләрендә дини сабак алучы шәкертләр дә, гомумән, теләге булган һәркем катнаша ала.

Әлмәт мөхтәсибәтендә квалификация күтәрү курслары тантаналы мәҗлес белән ябылды

Тантаналы мәҗлес Әлмәт үзәк мәчетендә узды. Бу чарада ТР МДН вәкилләре, имам-мөхтәсибләр, әлмәт имамнары һәм аксакаллары, мәдрәсәнең укутычылары катнашты. Шулай ук мәҗлестә мөфти Камил хәзрәт Сәмигуллин исеменнән рәхмәт хатлары тапшырырды. 

Әлмәттә Мәүлид бәйрәме шәһәр дәрәҗәсендә уздырылды

"Нефтьче" мәдәният сараенда пәйгамбәребез Мөхәммәднең туган аена багышланган тантаналы бәйрәм чарасы үтте. Анда мөфтият вәкилләре, республикабызның мөхтәсибләре, Әлмәт районы имамнары, мәхәллә халкы һәм укучылар катнашты. Әлеге бәйрәмне Әлмәт районы мөхтәсибәте оештырды.

Әлмәт муниципаль районы башлыгы урынбасары Наҗия Хәйдарова әлмәтлеләрне һәм кунакларны районыбыз башлыгы  Айрат Хәйруллин исеменнән бәйрәм белән тәбрикләде. Наҗия Мисбах кызы Әлмәт районы мөхтәсибәтенә мәгърифәтчелек эшен зур дәрәҗәдә алып баруы өчен рәхмәтләрен җиткерде.

Әлмәт мәктәбендә «Əдəп төбе – матур гадəт» дигән очрашу узды

20-нче мәктәбендә уздырылган чарада Әлмәт районы имам-мөхтәсибе урынбасары Рузиль Ихсанов катнашты. Очрашуда укучылар «Тəрбияле бала» (авторы – Риза Фәхреддин) китабыннан алынган цитаталар белән чыгыш ясадылар, шулай ук зарарлы гадәтләрен зыяны турында сөйләделәр. Рузиль Ихсанов үз сөйләмдә ата-аналарны, бер-берсен хөрмәт итү турында фикерләрен җиткерде. 

Республика имамнары Риза Фәхреддиннең мемориаль музеенда булдылар

Әлмәттә квалификация күтәрү курсларында катнашкан имам-мөхтәсибләр Кичүчат авылында урнашкан Риза Фәхреддиннең мемориаль музеенда экскурсиядә булдылар. Кунаклар күренекле дин галиме,  мәгърифәтче Риза Фәхреддиннең туган җирен күрделәр, рухи мирасы белән таныштылар. 

Битләр